Jetztdad kanns gsogt werdn. De Geheimhoitung is vorbei und dem Herzkönig muas fia seinen diplomatischen Schachzug gedaunkt werden. Wos is gscheng? Da Herzkönig hod auf Instagram a Video veröffentlicht, auf dem ma den Leopard II Paunza im Manöva siacht.
Könige lieben jo bekauntlicherweis Manöva. Und in dem Zusammenhang hod er auf de Vorbereitungen des Einsotzes fia de Mission Artic Defense hingwisn. Najo und unmittelbor darauf hods an Deal gebn. Dea Zusammenhaung is eindeutig. Ned nua zeitlich.
Der Herzkönigliche Geheimdienst hod nemli a nu den Amerikanan Dokumente zuagspüd, wia ma innerhoib küazesta Zeit und völlig unbemerkt militärisches Gerät duathi bringa kau. Jeda vo de Paunza kau gaunz schnö zlegt werdn und in ana unscheinborn Schochtel (mit blumladn Musta) vesteckt werden. Und so a Schochtl kaun ma jedn Schiffanakl mitgebn, des duat hi foad. Und soitads schnö geh messn, passn in an A400M 40.000 bis 50.000 soichane Schochtln.
Do haums offenbor schee gschaud, de Amerikana. De anzige Froge is, ob des herzkönigliche Manöva ind Gschichtsbiachl einigeht, wia da Schlieffen-Plan oda d Spannocchi–Doktrin?
Im recht koidn Jänna gings zu zwoa musikalischen Highlights. Des woa amoi Frida Gold. De hod da Herzkönig seit am Mitschnitt in da Serie ZDF Bauhaus vor mehr ois zehn Joa kenna glernt. Seitdem mog as. Und da de offenbor nu nia ned in Wean woan, is Zeit worn. Jednfois sans mitn neichn Album noch Wean ins B72 kumma.
Do wors olladings derortig koid, das maunche mid Jackn auf da Taunzfläche worn. Obgesehen davon wors a großortiges Konzert. Herzerwärmend, trotz der Ködn. Und da Herzkönig muas zuageben, davor hod er scho a in des neiche Album einighoarcht. Owa wirklich zaaht hods ned. Owa seid dem Konzert is ois aundascht und des Album rennt in Dauerschleife. Vielleicht liegts an da Widmung?
Nochdems duatn owa so saukoid wor, hod da Herzkönig beschlossen, das eam so a Aunfängerfehler nimma passiert. Und gesagt, getan: zum nächstn Konzert is a mit Skiunterwäsch gaunga. Des Konzert hedad a im Freien sei kinna, dafür wor der Herzkönig wor jedenfalls gerüstet.
Olladings, es woa ka Open Air. Und a offenbor haums in da Arena a einhoazt ghobt, weil do san Leit mit kurzen Iamin umadumgrennt. Und da Herzkönig hod in seiner Skiunterwäsch gschwitzt. Wia mas mocht, mocht mas verkead. Zua Musik: Beyond the Black worn solid, vor oim in da zweitn Höfte. Dem Herzkönig haum olladings a de Vorbänds sehr guad gfoin, im Besonderen woan SETYØURSAILS wiakli guad drauf.
Da Herzkönig is jo a in ned wirkli beneidenswerten Situation. Überoi auf der Wöd müssen ned gwöhde Häupter zittern. Der ane mehr, der aundane weniger. Und in Herzkönig hod jo a kana gwöd, so is des hoid mit Gottesgnodentum. Und damit da Herzkönig ned gaunz so afoch wia der in Venezuela entfiad wern kaun, so hod er scho seit Joaren entsprechade Voabereitungen eingleit.
Des hod zan Beispü mid an Tiger-Paunzer begonnen.
Ollerdings gwingt ma mit dem heitzutogs a kan Kriag mehr. Des hod soga da klane Prinz gseng und si in seina Eigenschaft ois klana Födwöbi aun de Aufrüstungspläne beteiligt. Und offenbor in da domoligen Voikschui an gaunzn Generalstob eingerichtet und seine Schuikamarodn glei mid eingspaund.
Najo, wos soll i sogn, a großortige Bastelei jedenfois. Und hamtrogn hauma des Trum a nu messn. Recht kriegstauglich hods ned recht ausgschaut. Untergaunga is jo scho amoi, de Bismarck. Und waun de Neiwi Sils und de aundan Schpeschl Forses durchs Fensta kumman, daun hod da Herzkönig mid dem Schiffanackl sicha ka Leiberl ned. Kaunst di glei damid numamoi vasenkn.
Jedenfois hod des da Herzkönig zum Aunloss gnmma und aun sein Aumtskanzlei den Befö ausgeben, so oidfadasisch kauns ned weida geh. Mia messn a bisl moderner werdn. Des is daun im letzten Joa passiert, mit am Cobra-Kaumpfhubschrauber. Do hod a si glei sicherer gfühl.
Olladings hod der mittlerweile a Rotorblattl weniger, oiso nua mehr bedingt flugtauglich. Do hod da kloane Prinz gsogt, a Paunza muas her. Und er hod si an Leopard II gwunschen.
Da Paunza is natiali glei am Woidviatla Privattruppenübungsplotz ausgibigst getest wordn. Er hod si recht brav gschlogn und wöchane Teile er verlorn hod, messma jo ned glei sogn. Militärisches Geschäftsgeheimnis. Und schiassn kaun er a ned. Owa a des muas ned jeda glei wissn.
Eigentlich reichn zwoa Berichte aus da Zeitung. Damit is ollas gsogt und damit woas ma eigentli ois, wos im letztn Joa wichtig wor, nämlich zwischenmenschliches. Nua a Frog bleibt offen: wos is besser, a Hawara untam Bett liegad oder ana, der aun da Fassad hängd?
Offenbor is da literarische Gschmock des Herzkönigs ähnlich seim Musikgschmockn. Zumindest legn des de Titl va de Biachl nohe, de er z Weihnochtn gschenkt griagt hod. Des ois zan Lesen, geht si bis zum End vo de Feiertog höxtworscheinlich nimma aus.
Vo am Joaresrückblick, über Krimis zu an Kochbiachl is ois dabei. Apropo Kochbiachl. Dos neiche is wirklich dringend notwendig wordn, hod dea Herzkönig bislaung nur so a ödas Exemplar vo am Kochbiachl besessen. Do drin stengan natiali a a bor Rezepte, ober vü a so grundsätzliche Verhoitensregln. Oiso, wia zan Beispü zua Frog, wos woatet ma seine Gäst ba ana Hausparty auf: „Eine andere Technik, die weniger Arbeit macht, besteht darin, den Gästen eine oder mehrere Schüsseln mit Salaten vorzusetzen.“ Nau prack, des wuatad a kurze Party.
Daun gehts owa glei zu de wirklich wichtigen Frogn der Getränke. Wiafü Alkohol soi ma aufworten? Do steht, des kau ma ned so sogn: „Das hängt natürlich sehr von der Trinkfestigkeit, beziehungsweise dem Fassungsvermögen der Gäste ab.“ Wichtig laut dem Biachl is der Mitternochtssnäck. Mid ana guadn Suppn losst si dea mid Akahoi überanstrengte Mogen wieda eirichtn. Und danoch? „Auch einige warme Würstchen tun gute Dienst, zu denen man ruhig, wenn es sich wirklich zum Abschluss des Abends handelt, ein bitteres, kaltes helles Bier trinken kann.“ Ma siagt, des oide Biachl is recht alkoholisch – vom neichn erhoff i ma doch a kulinarische Erkenntnisse.
PS: aund da „Sopa de lentejas“ iss i scho zwoa Tog laung 😉
Am Joaresend is Zeit, a musikalisch zruck zan blicka. Bedauga muas si da Herzkönig gaunz bsundas bei Spotify. Weil de haum wida moi bewiesn, das einzig und alanig de Musikalität jung hoid. Ned ohne Grund is des Öta vom Herzkönig auf 27 Joa eingeschätzt wordn. Des is jetztdad a nu aumtlich vo da herzkiniglichen Aumtskanzlei bestätigt word.
A de Liveauftritte, de a bsuacht hod, haum sichalich a zum Jungbleiben beitrogn.
Des Joa hod amoi ungeplanterweise mit Bilderbuch und dera ean Jubiläumskonzert augfaunga. Eigentli hod er gor ned hinwoin, is owa daun do midgaunga und hod voi vü bekaunte Gsichta im Publikum gseng. Warum ea s ned seng woitad. Weil eas scho gseng hod. Domois hods da Herzkönig in Gmünd am Palaverama-Festival gesengn. Des muas so um 2007 gwesen sein und do sans ned wirkli guad in Erinnerung bliebn. Owa ma muas anerkennend festhoidn, de haum si 20 Joa ghoidn. Und wia. Und des eigentlich nua mid am azigen sauguadn Riff.
Daun hod si da Herzkönig midn klan Prinzen nu de Esther Graf auf der Donauinsel anghoarcht. Wor solide, ober ned wahnsinnig aufregend. Irgendwia haum a a vergessen a Foto zan mocha, oda mia findens grod ned. Im Gegensotz zua Donauinsel is es bam Popfest, vor ollem bea da Eli Preiss obgegaungen. Textsicher wor des Publikum a.
Ma kaun do jo scho durchaus a (weibliches) Muster bam Herzkönig erkennen, des scho friacha gebn hod (L7, Belly, Veruca Salt, Hole, …). Des hod si hoid mit Nina Chuba in Graz fortsetzt. Des wor prinzipiell a a einwaundfreies Konzert und de Nina Chuba spüd a eigene Liga, nur de Örtlichkeit hod dem Herzkönig gor ned gfoin. De Freiluftarena hod eam aun an überdochten Stodl erinnert und der Ton wor unaungenehm laut. A draussen nu.
Muster – sogoa a weibliche – messan natiali maunchmoi a durchbrochen werdn. Des is mit Max Raabe passiad: do bin i eigentlich wida moi zu meim Glick zwunger wordn. Und do hob i eigentli nua mitgeh messn, um den Oitasschnitt des Publikums zum senken. Und i muas sogn, des hod kloppt. Ebenso beeindruckt haum die Ansprachen noch de Liada: „Das verklungene Stück entstammte…“ Glernt hod da Herzkönig dabei a wos. Wer do so nu midn Raabe zaumorbeiten duad: oiso da Peter Plate oder de Annette Humpe.
Daun hod da Herzkönig glesen, dass Divokej Bill an Auftritt bam Weinfestl in Mikulov hod. De kennt da Herzkönig a scho laung, oiso seit Pocit, des auf irgnedan Musiksender grennt ist. Oiso auf und durt hin. Vom Parkploz in d Stodt wors scho a Hatscha, vo da Stodt aufn Berg auffi zua Bühne wor nu amoi ana. Owa es hoid si auszoid. Scho de Vorbänds worn guad und Divokej Bill ausgezeichnet. Der azige Nochteil is, das da Herzkönig nur trochu Tschechisch spricht und des midsinga is, waun ma hoid fost koa Tschechisch kau, wirkli herausfordernd. Owa a des hod a gschofft. Und bam nächstn Moi muas da klane Prinz mid, weil dem daugt seit neichesten a a Liadl: Tsunami.
Da gloareiche Höhepunkt des Joares wor ober am End des Joares: Lafee. De is zwor in da SimmCity in Simmering auftreten und des wor durchaus a Herausforderung, überhaupt des zan finden: lauter schworgekleidete Leid san do im Einkaufszentrum herumgeirrt auf der Suche nochm Eingaung. Ober letztendlich doch erfolgreich. Und es is scho bei da Umbaumusi zuagaunga und olle haum zu Bon Jovi gsunga. Und bei Lafee wors ned aundast. Und de Hoa san a gflogn, in olle Richtungen.
Ajo wer si jetzt schwaduad, den Musikgeschmock des Herzkönigs einzuordnen… Jo a Spotify steht vor dem Problem….
Des Joa woa i a damit beschäftigt, a Biachl fia an Wissenschoftler aussazanbringa, der in de 1970er und 1980er Joa recht aktiv in der neichen Rechtsinformatik-Szene wor. Spaunend wor dabei, wia laung des domois dauert hod. Wia laung es braucht hod, das etwa a maschinschriftliches Dokument, de Schreibmaschin staumd ausm 19. Joahundert, im notarliellen Bereich da Haundschrift gleichgesetzt woan ist. Des is erscht in de 1920er Joa passiert. Gabs friacha launge Entwicklungszyklen – ba de Computer hod ma vo Generationen gesprochen – so passiert des heitzutoge wesentlich schnöller, ma redt ned amoi mea vo Monatszyklen, sondern gor scho vo Togeszyklen….
Es is si wida ausgaunga und die neicheste Ausgob der Zeitschrift „Das Waldviertel“ is knopp voa Weihnochtn im Postkastl glaundet. Ba wem hod ses nu untan Christbam gschofft? Es geht um Lehra oder genauer gsogt a gaunze Lehrerdynastie; daun um die Lehrerausbüdung in Krems, um de Redemptoristen in Eggenburg im Joa 1852, um des Schloss in Rosenau und um Amerika. Oiso hoffentlich wieda fia an Jedn oder a Jede wos dabei.
Da Novemba is voi mit Terminen im Woidviatl. Ma kunntad sogn, da Herzkönig hods drawig.
De aktuelle Ausgob der Zeitschrift is da Moaktgemeinde Thaya gewidmet. De hod nämli heia des 850-Joa-Jubiläum gfeiert. Und wia kunntad ma bessa gratulian, ois wia mid an Heftl. Des wiad am 21. Novemba im Gosthaus Trefanitz in Thaya um siebene aufd Nocht vorgstöd. Supa Numma übrigends. Da Herzkönig hod do a söwa an kurzn Beitrog zur Situation ums Joa 45 geschriebn.
Und nextn Tog gehts noch Eggenburg. Vom Laund ind Stodt. Duatn feiert de Krahuletz-Gsöschoft 125 Joa. Ned so oid wia Thaya, owa a a scheene Zoi. Und a duat bin i duat. Hoffandli beide Mole mit ana Gscheitn, dass poscht.
Jezdad haumma a nu zwoa Ausgoben der Zeitschrift überseng. Des wiad jetzt gaunz kurz und knopp nochghoid. De erste Ausgob hod si beispüsweis mit der jidischen Gschicht in Woadhofn auseinandergsetzt. De zweite daun midn Ende des Zweitn Wödkriags. Do hods an wichtign Beitrog zu den Vorgängen und dem Massaker in Stoa gebn, oiso in der Hoftaunstoit.
mei hompeitsch - was als papablog begann... 