Autor: jessasnablog

Österreichs Spuren in Amerika, vo de Habsburger bis zan Tramp hoast a Sendung vom ORF. De is übrigends do in da Mediathek nu zan seng. Und ma kau sogn, Ehre wem Ehre gebührt, ba da Minutn 33 wurdn zwoa Seiten aus meiner Diss obbüdelt. Und wenig späder wiad de Gutenbergbibel zoagt. Oiso, des muast a amoi schoffn.

Im 19. Joahundert san Millionen aus Europa noch Amerika ausgwaundert und haum auf a besseres Lebn ghofft. Mi hod interessiert, wer hod si um de kümmert und daun bi i auf den St. Raphael-Verein aufmerksam gmocht wordn. Er hod a internationales Netzwerk aufbaut, de ned nur a rein seelsorglich orintierte hilfseinrichtung wor.

Ajo fois wen interessiert, mei Diss ausm Joa 2005 gibts in beispüsweise in da Uni-Bibliothek, a bor Joa speda daun a ois Biachl

„Und wir sollen es zulassen, dass unsere Landsleute verkauft und verschachert werden? Katholisches Engagement für Emigranten der Habsburgermonarchie in der ‚Alten‘ und ‚Neuen‘ Welt 1880-1918“, Diss Univ. Wien 2005

Der österreichische „St. Raphael-Verein“ zum Schutze der Auswanderer: katholisches Engagement für Emigranten der Habsburgermonarchie in der „Alten“ und „Neuen“ Welt (1880–1918). Saarbrücken: Südwestdt. Verl. für Hochschulschriften, 2009.

Wea aufn Google nu wos suacht is vermutlich ohnehin in da Minderheit, wei auf überprüfbore Webseiten wiad ma seit geraumer Zeid goa nimma geleitet. Da Trend geht in Richtung KI-Auntworten.

Den Vogl haums owa in de letzten Tog obgschossen, wenn ma ois Rapidler noch Rapid suacht feiert da Google Rapid ois Moasta. Entweder is des ois Nochitreten auf am Boden liegende Rapidler zu verstehen und ma muas Google a nu auf Schmerzensgöd verklogen. Oder de sauffan? Nua wos? Zumnidest ans woas ma: Austriana hackeln ned ba Google!

Und bittgorschee wer kaun, aun Google weitersogn: da LASK is Moasta woan.

Da Herzkönig is jo scho imma scho a Fan gwesen von übernatürlichn Phänomenen. Mit Alf im Fernschaun hod des augfaungt und mit Agent Scully gings weida.

In letzter Zeit gibts olladings schau Sochen, de scho irgendwie passen, owa wia des zstaund kummt, is unerklärlich.

Augfaungt hods, das si da Herzkönig im Kino den Füm Ein Münchner im Himmel augschaut hod. De Gschicht is seicht, owa der Füm hod seine Höhen und vor ollem emotionale Momente. Fost san de Augal vo de bor Kinohansln feucht worn. Und trotz der afochn Gschicht wor er unterhaltsam und es wuadt am ned laungweilig. Und de Musi is a guad. Und Ina Müller is Gott. Owa des haumma e scho imma gwusst.

Owa, seid i ausn Kino aussagaunga bin, griag i so a komische Werbung vo verschleierte christliche (Jung?)frauen, de unbedingt wos mid mia aufaunga woin. Wia geht des? Und wöchan Füm muas i s nexte Moi schaun, das des wieder weggeht?

Aunlässli vo 40 Joa Tschernobü hod da Herzkönig a bisl in da domoligen NÖN blattelt. Dabei is eam owa gaunz wos aundaschts aufgfoin. Wenn ma de Schlogzeilen durchlest, kunnt ma moana, de waradn vo heit:

• „Die Luft wurde schon ,besser‘, aber ab 1991 strenge Heizvorschriften“
• „Der Ausbau der Wasserkraft ist jetzt Gebot der Stunde“
• „Braunbären unterwegs als ,Liebespärchen-Schreck'“
• „Eine Borkenkäferinvasion bedroht große Flächen der Waldbestände“
• „Schwefelgehalt in den Bäumen stieg um zwölf Prozent!“
• „Flussperlenmuscheln zum Aussterben verurteilt“
• „Gibt es bald keinen Erdäpfelsalat mehr bei Volksfesten?“
• „Entscheiden die Stöckelschuhe über den neuen Straßenbelag?“
• „Schnellstraße fiel Minister-Rotstift zum Opfer“
• „Falco spendete Pop-Amadeus für die Dialysestation Horn“
• „NÖ: Japanisch in der AHS?“
• „Promillestraßen: Jetzt spezielle Überwachung“
• „Bürgermeister und Fleischer wegen Misthaufen im Clinch“
• „Schüler drohten mit Sprengung des Gymnasiums“
• „1987 wird ein ,kritisches Jahr‘ Steuerreform bremst das Budget“
• „Schnellpostdienst verkürzt Wege der Briefbeförderung“
• „Fallender Doller bestimmt Pelzpreis!“
• „Schimanek jun. stellte sich ,Rechts-Diskussion'“

So, damid dürft für jeden wos dabei sein. Mia hod des mit de Stecklschua gaunz guad gfoin – do gings um Zwettl und um de Pflosterung bam Dreifoitigkeitsplotz.

A bisl hods mi söwa überroscht, dass der domols zum Bundespräsidenten gwöhte Waldheim a Vorreiter in so vü Bereichen gwesen sein dürfte: a Vorkämpfa fia Frauenrechte, fia a bessere Schuibüdung, daun hod a a Idee von ana „umfassenden Umweltverteidigung“ ghobt und si fia „alternative Energieformen“ ausgsprochn. Und daun hod a si – do hod Tschernobü a a gewichtige Rolle gspüd, zu am Gegna da Kernenergie entwicklt. Des hod si olladings heitzudog in Österreich wieder draht. Mitterlweile steht in der Zeidung wida wos so „Atomkraft im Aufwind“ (Der Standard 25/26. April, S. 3).

Wers Inserat nochschaun mog: NÖN/Zwettler Zeitung vom 5. Juni 1986.

Wos gibts scheenanes, ois zur Osterzeit Briefmarken zu soatian. Zwischen Essn und Nopfizn gibts immer so woche Momente, de si dafia aunbietn. Und do hod da Herzkönig doch tatsächlich wos entdeckt.

Wei beim Briefmarkensortieren ist ma jo Zeitroasenda und Wödroasenda zgleich. So schnö kaunst gor ned schaun und du bist scho im Drittn Reich. Oba a do muast bsonsers guad schaun und do is in Herzkönig aufgfoin, dass do ba ana Briafmarkn ausm Generalgoverment (oiso bsetzte poinische Bebiete) auf ana Allongn steht, das de Markn vo da Weana Staatsdruckerei staumt. Da Vorteil ba de Marken is, ma kaun jo gaunz schnö Zeit und Ort wieda valossen. Oiso nix wia weg. Gaunz weit weg. Und wos hob i do nu entdeckt. Oiso gaunz wo aundascht? In Haiti hod a de Weana Staatsdruckerei vü späda wieder de Finga im Spü ghobt.

Jetzt hod da Historiker in mia aubissn. Des kau ned Singulär sei, do muas an Zusaumenhaung gebn. Nur wöchan?

Es geht um verschwundene Siedlungen und Dörfa, oiso Wüstungen. Und das es domois scho beklogt wurde. Zumindest kaun ma des bam Soga vom Walther von da Voglweide intapretiern: „Ôwê, war sint verswunden alliu mîniu jâr?“

Daun gibts an Beitrog über an Nationalsozialisten ausn Woidvital, des zum Brigadeführer in da SA brocht hod. Wias mit eam nochn Kriag weida gaunga is, kummt im nächsten Heft.

Und daun gehts a nun um Schneckn und Muscheln. Wos ma hoid so finden duadn, wauns regnd.

Mea dazu: www.daswaldviertel.at

Maungels eigener Osterkiste hod da Herzkönig in dem Joa a sogenaunntes „Upcycling“ vornehma messn. Dazua hod a de Adventkeazn gnumma und dazwischen a bor Ostahosn gesetzt. Weil des passt jo eigentli imma. Es is imma iagendwia vor Weihnochten, a za Ostan. Somit. Frohe Ostan.

Da Herzkönig hod si zu dera Aunkündigung vom Regenten bislaung nobl zruck ghoidn. Owa er hod si sein Teil docht. Nochdem eam owa jetzdad sei eigena Zivüdiensteinruckungsbescheid ind Händ gfoin is, muas a doch a bor Bemerkungen dazua mocha.

Da Zivüdienst hod imma a weingal länga ois da Militäadienst dauert, in de 1970er Joa zwölf Maunad, späda daun ocht und daun wieder zehne. Ois da Herzkönig drau woa hod ma des au öf Maunad verlängert, a Joa späda daun auf zwöfe. Irgendwaun hod ma des wieder auf neine reduziert. Und ba dem gaunzen auf und ob, runta und rauf, hod do iragendwer jemois iagendwen dazua befrogt?

Ajo, wos i ma damerkt hob woa, wiafü ma domois verdient hod: des worn genau 2.222 Schülling pro Maunad.

Jetztdad kanns gsogt werdn. De Geheimhoitung is vorbei und dem Herzkönig muas fia seinen diplomatischen Schachzug gedaunkt werden. Wos is gscheng? Da Herzkönig hod auf Instagram a Video veröffentlicht, auf dem ma den Leopard II Paunza im Manöva siacht.

Könige lieben jo bekauntlicherweis Manöva. Und in dem Zusammenhang hod er auf de Vorbereitungen des Einsotzes fia de Mission Artic Defense hingwisn. Najo und unmittelbor darauf hods an Deal gebn. Dea Zusammenhaung is eindeutig. Ned nua zeitlich.

Der Herzkönigliche Geheimdienst hod nemli a nu den Amerikanan Dokumente zuagspüd, wia ma innerhoib küazesta Zeit und völlig unbemerkt militärisches Gerät duathi bringa kau. Jeda vo de Paunza kau gaunz schnö zlegt werdn und in ana unscheinborn Schochtel (mit blumladn Musta) vesteckt werden. Und so a Schochtl kaun ma jedn Schiffanakl mitgebn, des duat hi foad. Und soitads schnö geh messn, passn in an A400M 40.000 bis 50.000 soichane Schochtln.

Do haums offenbor schee gschaud, de Amerikana. De anzige Froge is, ob des herzkönigliche Manöva ind Gschichtsbiachl einigeht, wia da Schlieffen-Plan oda d Spannocchi–Doktrin?