Konzertsumma

Da Summa wor in dem Joa ziemlich guat, oiso musikalisch gseng. Und er is ziemlich schnö vergaunga.

Auf da Donauinsl hob i do und duatn a bisl zuaghorcht. Bewusst hob i ma Dominique Jardin ausgheart. Des wor bummvoi und do wors nochher wirkli schwa, do aus dera Menge wieda aussa zan keima.

Wesentlich entspaunter wors am Popfest am Korlsplodz mit Marianne Mendt – jazzig – und Anna Buchegger – klass.

In der Berliner Wuhlheide gings dann zu Alligatoah. De Wuhlheide is a richtig schene Konzertarena, ma siacht a mid Kids von oben guad owi. Der Sound wor in dem Joa ned so bsunders. Des hod vielleicht a mid meim Handy zdoadn ghobt. Wei ba de Videoaufnahmen, die i vom Konzert gmocht hob woa immer irgendwie a komplett aundana Ton zan hean. Ois ob ma do irgendwer a komplett aundane Musi einigspüd hedad. Najo, Berlin, Stodt der Spione?

Am End vom August gings daun a nu noch Coburg. Warum grod Coburg? Weil mas kau. Obwoi, Coburg is a richtig nette Stadt, hod an weitläufign Park mit schönen Spielplätzen und a ordentliche Burg. Und Santiano hod do a gspüd. Solides Konzert und den Oitasschnitt hamma a ordentlich gesenkt.