Es hod hoid sei messn. Und das i des nu daleb, den Füm im Kino zan schaun, hed i a nimma glaubt. Owa, zan 40. Geburtsdog woa des daun do nu megli. Oiso gings ins Kino zu ana, wia soi ma sogn, sehr privatn Voastöllung.
Des laare Kino hod zumindest den Vorteil ghobt, das ma midsinga hod kinna, ba great balls of fire zum Beispü.
Den Füm hob i des erste Moi auf ana VHS-Kassetn gseng. A domois alanig im Wohnzimma. Den hod ma mei Kusei aus Linz bsorgt, vermutli wia a im Sat-Fernsehn zoagt woan is. Wei Sat haumma kan gobt.
Auf dera Videokassetn wor daun a nu a zweita Füm. Do bin i a irgendwihänga bliebn, wei waun a Füm scho Dirty Dancing hoast… muas ma fost gezwungenermaßen a bissl einischaun. Najo jedenfois hod der Füm daham nur a kurze Spüzeit ghobt, weil da Votta zufällig ins Wohnzimma einakumma is. Und mit Top Gun wors daun a a Zeidl vorbei.
mei hompeitsch - was als papablog begann... 